Lənkəranda indiyə qədər qızılcaya yoluxanların sayı 447 nəfərdir. Bu haqda məlumatı Cenublu.az bu gün, 26 fevral tarixində AzTV-yə istinadən verir.
Yoluxanların əksəriyyəti uşaqlar və yeniyetmələr olsa da, yaşı 18-i ötənlər də az deyil, bir nəfər isə 61 yaşındadır.
Hazırda rayonda qızılca xəstəliyinə yoluxan 28 nəfər stasionar və ya ambulator şəraitdə müalicə olunur. Eyni zamanda bu xəstəliyə qarşı peyvəndləmə aparılır.
Lənkəran şəhər Ailə Sağlamlıq Mərkəzinin pediatrı Müseyib Mirzəyev bildirir ki, son vaxtlar qızılca peyvəndinə qarşı aktivləşmə hallarına rast gəlinir:
“Dekabr ayından bu yana 620-dən artıq uşağa qızılcaya qarşı peyvənd vurmuşuq. Əvvəllər imtina etmiş uşaqlar da, valideynləri də olub. Təqribən 240-250 nəfərə yaxın imtina etmiş uşaqlara biz qızılcaya qarşı peyvənd vurmuşuq”.
Həkimlər deyirlər ki, qızılcaya qarşı peyvənd 2 doza olmaqla uşaqlara 1 və 6 yaşlarında vurulmalıdır. 6 yaşdan böyük uşaqlar üçün 4 həftə ara verməklə 2 doza halında peyvənd vurula bilər:
“Statistika göstərir ki, adətən peyvənd almış uşaqlar, ümumiyyətlə, ya o xəstəliyi keçirmir, yaxud keçirəndə də yüngül formada keçirirlər. Mən valideynlərə üzümü tutub deyirəm ki, gəlsinlər, peyvəndləşmədən qorxmasınlar, vaxtilə imtina etmiş valideynlər də bir daha götür-qoy etsinlər, fikirləşsinlər ki, hələlik bundan yaxşı yol yoxdur”.
