Əkin mövsümü ilə əlaqədar Lənkəran və Cəlilabad rayonlarının meşə fondu torpaqlarının açıq sahələrində torpaq hazırlığı işləri aparılıb. Bu haqda məlumatı Cenublu.az bu gün, 23 avqust tarixində verir.
Meşələrin İnkişafı Xidmətinin rəsmisi Vahid Fərzəliyev bildirib ki, payız əkin planına uyğun olaraq, meşə sahələrində hər bölgənin torpaq-iqlim şəraitinə uyğun Regional Meşə Təsərrüfatı Mərkəzlərinin tinglik sahələrində yetişdirilmiş palıd, fıstıq, vələs, ağcaqayın, qarağac, çinar, cökə, göyrüş və digər müxtəlif cinsli ağaclar əkiləcək və toxumlar səpiləcək.
Xidmət rəsmisi qeyd edib ki, hazırda aparılan torpaq hazırlığı işləri ilə yanaşı, Regional Meşə Təsərrüfatı Mərkəzlərinin tinglik sahələrində aqrotexniki qaydalara uyğun olaraq, xidmət, suvarma işləri aparılır, tinglərə üzvi və mineral gübrələr verilir:
“Tinglik sahələrdə yetişdirilən tinglərdən 1,5 milyonu payız əkin mövsümündə meşəbərpa tədbirlərində istifadə olunacaq”.
