Lənkəran rayonunun Sütəmurdov kəndində şəhid Rəşid Rəşad oğlu Məmmədovun xatirəsinə inşa olunan bulaq kompleksinin açılışı baş tutub. Bu haqda məlumatı Cenublu.az bu gün, 16 sentyabr tarixində Lənkəran ŞİH-yə istinadən verir.
İcra başçısı Taleh Qaraşov bulaq kompleksinin açılış lentini şəhidin atası Rəşad Məmmədovla birgə kəsib. Daha sonra giriş nitqi ilə çıxış edən icra başçısı bildirib ki, şəhid ailələrinə xüsusi qayğı və diqqətin göstərilməsi, eyni zamanda Vətən uğrunda canından keçən qəhrəmanlarımızın adlarının əbədiləşdirilməsi daim cənab Prezidentin və Birinci vitse-prezidentin diqqət mərkəzindədir. Həmçinin o, sentyabrın 12-si gecə, 13-ü səhər saatlarında Ermənistan ordusu tərəfindən törədilən təxribatlara toxunub. Bildirib ki, sərhədlərimizin qorunması uğrunda həlak olan vətəndaşlarımızın qisası alınıb. Lənkəran rayonunun Nərimanabad qəsəbəsindən də sözügedən təxribatlar zamanı bir sakinin şəhid olduğunu vurğulayan icra başçısı şəhid valideynlərinə, onların ailə üzvlərinə, habelə Lənkəran ictimaiyyətinə başı dik, vüqarlı duruşları, qətiyyətli mövqeləri ilə dövlətin yanında olduqları üçün təşəkkürünü bildirib.
Qeyd edək ki, şəhid Rəşid Məmmədov İlham Əliyevin müvafiq sərəncamlarına əsasən, ölümündən sonra “Vətən uğrunda”, “Döyüşdə fərqlənməyə görə”, “Cəsur döyüşçü” və “Şuşanın azad olunmasına görə” medalları ilə təltif olunub.
