Lənkəran rayonunun Şağlaser kənd orta məktəbinin binası qəzalı vəziyyətdədir. Bu haqda məlumatı Cenublu.az bu gün, 28 noyabr tarixində Apa TV-yə istinadən verir.
Belə ki, kənd məktəbi 1990-cı ildə fin tipli layihə əsasında tikilib və istifadəyə verildiyi gündən indiyə kimi heç vaxt əsaslı təmir edilməyib. Məktəbin çöl divarları eroziyaya uğrayıb və çatlar əmələ gəlib.
Məktəbin direktoru Yalçın Əliyev məsələ ilə bağlı bildirib ki, aidiyyəti orqanlar məktəb binasının vəziyyətindən xəbərdardırlar. Məktəb binasına baxış keçirilib, qeydiyyat aparılıb. Məktəbin hasarlarının dağılması ilə bağlı narahatlığını dilə gətirən direktor bildirib ki, daxili imkanlar hesabına təmir işləri aparılıb. Lakin hasarlar yenidən dağılıb və bu da mal-qaranın məktəbin həyətinə daxil olmasına səbəb olur. Bu də dərs prosesini və uşaqların təhlükəsizliyinin təmin edilməsini çətinləşdirir.
Məsələ ilə bağlı Lənkəran – Astara regional təhsil idarəsindən şifahi olaraq bildiriblər ki, növbəti il ərzində Şağlaser kənd tam orta məktəbində təmir-bərpa işlərinin görülməsi nəzərdə tutulub.
Qeyd edək ki, 624 yerlik Şağlaser kənd tam orta məktəbində hazırda 305 şagird təhsil alır. Məktəb binası 24 sinif otağından ibarətdir.
