Lənkəran rayonu, Göyşaban kəndi ərazisində yerləşən tullantıların zərərsizləşdirilməsi poliqonu ətrafda yaşaya sakinləri narahat edir. Bununla bağlı onlar bu gün, 29 iyul tarixində Cenublu.az-a müraciət ediblər.
Sakinlər bildirirlər ki, mütəmadi olaraq poliqonda məişət tullantıları yandırılır və ərazini üfunət bürüyür:
“Qoxudan nə həyətə çıxa, nə də pəncərəmizi aça bilirik. Artıq uzun illərdir ki, bu vəziyyətdə yaşayırıq. Müasir tələblərə uyğun zavod tikmək mümkün deyilsə, heç olmasa, poliqonu yaşayış yerindən uzaq bir əraziyə keçirsinlər”, - deyə sakinlər bidiriblər.
Qeyd edək ki, məsələ Cenublu.az tərəfindən ötən il işıqlandırılmışdı. Lənkəran şəhər İcra Hakimiyyəti bildirmişdi ki, utilizasiya zavodunun tikintisindən ötrü aidiyyəti dövlət orqanlarına müraciət olunub və zavodun tikintisi Dövlət İnvestisiya Proqramına daxil edilib. Bu məqsədlər üçün vəsait ayrılacağı təqdirdə məsələ müsbət həllini tapacaq.
