Dövlət Gömrük Komitəsinin Cənub Ərazi Baş Gömrük İdarəsinin Əməliyyat və təhqiqat idarəsinin rəisi vəzifəsində işləyən Malik Əliyev və digər şəxslərin qanunsuz əməlləri barədə cinayət işi başlanılıb. Bu haqda məlumatı Cenublu.az bu gün, 1 sentyabr tarixində verir.
İstintaq-əməliyyat tədbirləri nəticəsində Malik Əliyevin işləyərkən vəzifə səlahiyyətlərindən sui-istifadə edərək ümumi dəyəri 30 min manat olan dərman vasitələrinin Astara gömrük postundan ölkə ərazisinə qanunsuz keçirilməsinə şərait yaratmasına əsaslı şübhələr yaranıb.
Əldə edilmiş ilkin sübutlarla Malik Əliyevin rəhbərlik etdiyi struktur qurumun rəis müavini Mehdi Mehrəliyev və gömrük inspektoru Zaman Əbdurəhmanovla qabaqcadan əlbir olaraq 10 min 400 manat məbləğində rüşvət müqabilində sahibkar Ramin Məmmədzadənin 60 min manat dəyərində məhsulları düzgün bəyan etməməklə gömrük sərhədindən keçirməsinə köməklik etməsi təsdiq olunub.
Toplanmış sübutlar əsasında Malik Əliyev və onun ortaqları 32.5, 206.1 (qaçaqmalçılığa köməklik etmə), 308.1 (vəzifə səlahiyyətlərindən sui-istifadə), 311.3.1 və 311.3.3-cü (qabaqcadan əlbir olan bir qrup şəxs tərəfindən və külli miqdarda rüşvət alma), Ramin Məmmədzadəyə isə həmin Məcəllənin 206.1-ci (qaçaqmalçılıq) maddəsi ilə ittiham elan edilib. Malik Əliyev məhkəmənin qərarı ilə həbs edilib, digər şəxslər isə polisin nəzarəti altına verilib.
Cinayət işi üzrə istintaq-əməliyyat tədbirləri davam etdirilir.
