Cənub bölgəsində qeydiyyatda olan 7 mindən artıq narkomanın 3700-ü Lənkəranın payına düşür. Bu haqda məlumatı Cenublu.az bu gün, 22 fevral tarixində verir.
Lənkəran rayonlararası narkoloji xəstəxanasının baş həkimi Vüqar Əliyev bildirib ki, xəstələr arasında yeniyetmələr, gənclər və qadınlar da var.
Həkim-narkoloq Əli Nəhmətli bildirib ki, müalicə dövrü təqribi 20 gündür.
Bu dövr ərzində xəstəyə detoksikasiya tədbirləri aparılır. Sonrakı mərhələ isə reabilitasiyadır, o da müvafiq mərkəzlərə müraciət edilərsə.
Bölgədə isə reabilitasiya mərkəzi yoxdur. Belə mərkəzlər yalnız Bakıda fəaliyyət göstərir. Ona görə də cəmi 20 çarpayılıq olan Lənkəran rayonlararası narkoloji xəstəxanasında müalicə olunan narkomanlar reabilitasiya mərhələsini keçə bilmirlər.
Lənkəran rayonlararası narkoloji xəstəxanasının baş həkimi Vüqar Əliyev qeyd edib ki, Cənub zonasında müasir reabilitasiya mərkəzinin fəaliyyətə başlaması yaxşı bir hal olar.
Polis də “ağ ölüm”lə kəskin mübarizə aparır. Keçirilən əməliyyyat-axtarış tədbirləri nəticəsində təkcə bu il Lənkəranda 61 kiloqram narkotik vasitə dövriyyədən çıxarılıb.
DİN-in mətbuat xidmətinin Lənkəran regional qrupunun baş inspektoru
Məhəmməd Rzayev bildirib ki, narkotik vasitələrin qanunsuz dövriyyəsi ilə əlaqəli 270 fakt aşkarlanıb. 281 nəfər müəyyən olunaraq məsuliyyətə cəlb olunub.
