Nəriman Məmmədzadə Lənkəran-Astara regionunun fərqlənən fiziki tərbiyə müəllimlərindən biridir. 1997-ci ildə Cəlilabad rayonunun Həziabad kəndində anadan olan Nəriman müəllim orta təhsilini burada alıb. 2017-ci ildə Astara Pedaqoji Kollecinin Fiziki tərbiyə fakültəsinə qəbul olub. Məzun olduğu 2020-ci ildə müəllimlərin işə qəbul imtahanında iştirak edib və Yardımlı rayonunun Horonu kənd tam orta məktəbində əmək fəaliyyətinə başlayıb.
Tələbəlik dövründə kolleclər arasında keçirilən voleybol yarışında birinci yerə layiq görülən Nəriman Məmmədzadə boks üzrə yarışın respublika üçüncüsü də olub. 2021-ci ildə yenidən müəllimlərin işə qəbul imtahanında iştirak edərək 45 balla Cəlilabad rayonunun Xanəgah kənd tam orta məktəbinə fiziki tərbiyə müəllimi təyin olunub. Həmin məktəbdə şagirdləri voleybol idman növü üzrə daha çox inkişaf etdirib.
Məktəblilərdən ibarət komanda yaradıb. Bu komanda dəfələrlə rayon çempionatlarında mükafatlar əldə edib. 2024-cü ildə müsabiqədə iştirak edərək iş yerini Banbaşı kənd Cavanşir Qasımov adına tam orta məktəbə dəyişdirib.
2023-cü ildə Azərbaycan Gənc Müəllimlər Assosiasiyasının (AGMA) keçirdiyi müsabiqədə “İlin gənc fiziki tərbiyə müəllimi” seçilən Nəriman müəllim səmərəli fəaliyyətinə görə Lənkəran-Astara Regional Təhsil İdarəsi (LARTİ) tərəfindən iki dəfə fəxri fərmanla mükafatlandırılıb.
Müəllimin muallim.edu.az-a müsahibəsini təqdim edirik:
- Nəriman müəllim, bəziləri elə düşünür ki, musiqi, təsviri incəsənət, fiziki tərbiyə müəllimliyini seçənlər digər fənləri yaxşı bilmədiklərinə görə bu sahəyə yönəliblər…
- Hər kəsin fikrinə hörmətlə yanaşmaq lazımdır, lakin qeyd edim ki, sadaladıqlarınız xüsusi qabiliyyət tələb edən ixtisaslardır. Elə insanlar var ki, bu ixtisaslardan biri üzrə təhsil almaq istəyib, amma qabiliyyət imtahanından keçə bilməyib. Bir sözlə, bu yanaşma tamamilə absurddur. Mənə gəldikdə, bu ixtisası seçməyim uşaqlıqdan idmana olan həvəsim, bu sahədə özümü daha çox doğrulda biləcəyimə inanmamla bağlıdır.
- Respublika və ya beynəlxalq səviyyəli yarışlarda uğur qazanan şagirdləriniz var?
- İşlədiyim məktəblər ucqar kəndlərdə yerləşdiyindən və maddi-texniki baza zəif olduğundan istədiyim nəticəni əldə edə bilmirəm. Amma rayon və region üzrə keçirilmiş çempionatlarda uğur qazanan şagirdlərim var.
- Şagirdlərinizin dərsinizə marağı necədir?
- Hər bir müəllim fənninə maraq yaratmağı bacarmalıdır. Şagirdlərin dərsimə marağı yüksək səviyyədədir, onlar hətta dərsdən sonra ayrıca məşğələ keçməyimi istəyirlər.
- Müasir dövrün uşaqları ilə işləmək sizə çətin gəlmir ki?
- Gənc müəllim olduğumdan müasir uşaqlarla işləmək mənim üçün elə də çətin deyil. Lakin bizim nəslin uşaqları ilə indiki uşaqlar arasında fərq var.
- Fəxri fərmanlara layiq görülmüsünüz, “İlin gənc fiziki tərbiyə müəllimi” seçilmisiniz. Sizi digər fiziki tərbiyə müəllimlərindən hansı xüsusiyyətlər fərqləndirir?
- “İlin müəllimi” seçilməyi işə başlayan gündən xəyal etmişəm, qısa müddət ərzində bunu bacara biləcəyimi isə xəyal belə edə bilməzdim. Amma yüksək əzmkarlığım sayəsində bunu bacardım. Təbii ki, bu ixtisas üzrə məndən daha təcrübəli olan müəllimlərin sayı çoxdur. Mən bilmədiklərimi onların təcrübəsindən yararlanaraq öyrənirəm.
