Cəlilabad rayonunda yerləşən Paşatəpə qədim yaşayış məskənində arxeoloji qazıntılar zamanı yeni maddi-mədəniyyət nümunələri aşkar edilib. Bu haqda məlumatı Cenublu.az bu gün, 31 avqust tarixində Azertac-a istinadən verir.
Ərazidə qazıntılar nəticəsində qədim insanların məşğuliyyəti ilə bağlı neolit dövrünə aid saxsıdan, sümükdən və dəvəgözü daşından hazırlanmış çoxsaylı məişət, bəzək əşyaları üzə çıxıb.
AMEA-nın Arxeologiya, Etnoqrafiya və Antropologiya İnstitutunun aparıcı elmi işçisi Vəfa Mahmudova bildirib ki, burada tapılan saxsı məmulatlarında müxtəlif bəzəklərə rast gəlinir. Həmçinin o ərazidə sümükdən, çaxmaq və külli miqdarda dəvəgözü daşından əmək alətləri və qədim dəfn adətləri ilə bağlı nümunələr də aşkarlanıb.
Üz-üzə dəfn edilmiş iki insan sümüyünün qalıqları burada qoşa dəfnetmə adətlərinin mövcudluğundan xəbər verir. Bundan əlavə, qəbir qalıqları ilə paralel ərazidə həmin şəxslərin məşğuliyyəti ilə bağlı unikal istehsal sobası da tapılıb.
Tarixçi Elçin Hüseynov bildirib ki, burada tapılan əmək alətlərinin zənginliyi, müxtəlif dəfnetmə adətləri və fiqurlar qədim insanların burada uzun müddət yaşamasından xəbər verir.
Qeyd edək ki, Paşatəpə artefaktının araşdırılması Qafqaz arxeologiyasında erkən əkinçilik mədəniyyəti və sənətkarlıqla bağlı yenilikləri üzə çıxara bilər.
