Cəlilabad rayonunun Boyxanlı kəndində sürüşmə baş verib. Bu haqda məlumatı Cenublu.az bu gün, 21 dekabr tarixində Apa.az-a istinadən verir.
Sürüşmə nəticəsində 10-a yaxın yaşayış evi təhlükə ilə üzləşib. Belə ki, kəndin qarşısındakı təpədə iri torpaq layları axaraq yaşayış evlərinə doğru hərəkət edir.
Ərazidə yaranan iri çatlara yağış sularının dolması buradakı sürüşmənin miqyasını genişləndirib. Nəticədə sürüşmə zonasının mərkəzində böyük çökəklik yaranıb. Artıq sürüşmə zonasının qarşısında yerləşən 10-a yaxın ev üçün təhlükəli vəziyyət yaranıb. Bəzi tikililərin divarlarında iri çatlar əmələ gəlib.
Sürüşmə zonasına, eləcə də yaşayış evlərinə Fövqəladə Hallar Nazirliyi (FHN) və Ekologiya və Təbii Sərvətlər Nazirliyinin regional idarələri tərəfindən baxış keçirilib. Müvafiq sənədlər hazırlanıb.
