Cəlilabadda Milli ədəbiyyatımızın ən görkəmli simalarından biri Cəlil Məmmədquluzadənin 155 illik yubileyinə həsr olunmuş tədbir keçirilib. Bu haqda məlumatı Cenublu.az bu gün, 22 fevral tarixində verir.
Tədbirdə Cəlilabad Rayon İcra Hakimiyyəti başçısının birinci müavini Qalib Xudaverdiyev, aparatın məsul əməkdaşları, rayon təhsil sektorunun nümayəndələri, ziyalılar və məktəblilər iştirak ediblər.
Əvvəlcə iştirakçılar ədibin abidəsini ziyarət ediblər, xatirə şəkilləri çəkilib və Dövlət Himni səsləndirilib.
Daha sonra Cəlil Məmmədquluzadənin 155 illik yubileyi münasibətilə Kazımabad kənd tam orta məktəbinin şagirdləri ədibin “Quzu” hekayəsini səhnələşdiriblər və həmçinin məktəblilər arasında şahmat yarışı keçirilib.
Tədbirin sonunda qaliblərə fəxri fərmanlar və medallar təqdim olunub.
Qeyd edək ki, Cəlilabad rayonu 8 avqust 1930-cu ildə yaradılıb. 1967-ci ilədək Astarxanbazar, 2 iyun 1967-ci ildən görkəmli yazıçı-dramaturq Cəlil Məmmədquluzadənin şərəfinə Cəlilabad adlandırılıb.
