Bu gün, 28 fevral tarixində şəhid Ülfət Babazadənin mövlud günüdür.
Ülfət Qabil oğlu Babazadə 2000-ci ildə Lənkəran rayonunun Daştatük kəndində anadan olub. 2019-cu ildə Azərbaycan Silahlı Qüvvələrinin sıralarında müddətli həqiqi hərbi xidmətə başlayır.
O, Cəlilabaddakı hərbi hissədə Xüsusi Təyinatlı Qüvvələrin sıralarında xidmətə göndərilir. Burada əsgər Ülfətin vətənpərvərliyi, təlimlər zamanı qeyri-adi döyüş bacarıq və qabiliyyətləri, Vətənə, torpağa sədaqəti aydın şəkildə özünü göstərir. Düşmənə nifrəti, qəzəbi isə onu daha da qətiyyətli edir. 2020-ci il sentyabrın 27-də torpaqlarımızı azad etmək uğrunda Vətən müharibəsi başlayanda o, həvəslə cəbhəyə yollanır, Kəlbəcər, Cəbrayıl, Füzuli və Şuşa rayonlarının işğaldan azad olunmasında fəal iştirak edir.
Neçə-neçə odun-alovun içindən zəfərlə çıxan gənc igidimiz düşmənin çoxlu sayda texnika və canlı qüvvəsini məhv edir. Şuşa şəhərinin işğalçılardan azad olunmasında xüsusi hünər göstərir. O, 9 noyabr – müharibənin son günündə Şuşa döyüşləri zamanı şəhid olur. Lənkəran rayonunda torpağa tapşırılır.
İlham Əliyevin sərəncamlarına əsasən, Ülfət Babazadə ölümündən sonra “Cəsur döyüşçü”, ”Vətən müharibəsi iştirakçısı”, “Kəlbəcərin azad edilməsinə görə”, “Xocavəndin azad edilməsinə görə” medalları ilə təltif edilib.
