Bu gün, 24 avqust tarixində Azərbaycan Silahlı Qüvvələrinin əsgəri, Vətən müharibəsi şəhidi İmaməli Şəvəqqət oğlu Əhədzadənin mövlud günüdür.
İmaməli Əhədzadə 1997-ci ildə Lənkəran şəhərində anadan olub. 2004-2015-ci illərdə Lənkəran şəhər Xarici Dillər Təmayüllü gimnaziyada təhsil alıb. Qısa müddət bir sıra mülki işlərdə çalışdıqdan sonra hərbi xidmətə yollanıb. Subay idi.
İmaməli Əhədzadə 2015-2017-ci illərdə Azərbaycan Silahlı Qüvvələrinin sıralarında müddətli həqiqi hərbi xidmət qulluqçusu olub. Tərtər rayonunda yerləşən "N" saylı hərbi hissədə xidmət edib. Hərbi xidmət müddətində 2016-cı il aprelin 2-dən 5-nə qədər davam edən Aprel döyüşlərində fərqlənib. 2017-ci ildə ordudan tərxis olunduqdan sonra mülki fəaliyyətinə davam edib.
Vətən müharibəsində könüllü olaraq iştirak edib. Füzulinin və Cəbrayılın azadlığı uğrunda gedən döyüşlərdə vuruşub. İmaməli Əhədzadə 28 sentyabr 2020-ci ildə Füzuli-Cəbrayıl istiqamətində döyüş tapşırığının yerinə yetirilməsi zamanı həlak olub. Lənkəran rayonunun Şiləvar kəndində dəfn olunub.
Ölümündən sonra "Vətən uğrunda", "Cəsur döyüşçü", "Füzulinin azad olunmasına görə", "Döyüşdə fərqlənməyə görə" medalları ilə təltif olunub.
