Bu gün, 24 avqust tarixində Azərbaycan Silahlı Qüvvələrinin mayoru, İkinci Qarabağ müharibəsi şəhidi Aqşin Nazim oğlu İbadovun mövlud günüdür.
Aqşin İbadov 1984-cü ildə Lənkəran rayonunun Boladı kəndində anadan olub. O, 2001–2005-ci illərdə Heydər Əliyev adına Azərbaycan Ali Hərbi Məktəbində "kəşfiyyatçı" ixtisası üzrə təhsil alıb. 2005-ci ildə o, "leytenant" rütbəsi alaraq, hərbi vəzifəyə başlayıb. Ağstafa rayonunda, Mingəçevir şəhərində, Murovdağda, Gədəbəy rayonunda yerləşən "N" saylı hərbi hissələrdə xidmət edib.
Azərbaycan Ordusunun mayoru olan Aqşin İbadov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi üçün başlanan İkinci Qarabağ müharibəsi zamanı Murovdağın, Füzulinin, Cəbrayılın, Xocavəndin və Zəngilanın azadlığı uğrunda gedən döyüşlərdə savaşıb.
O, oktyabrın 19-da Zəngilan döyüşləri zamanı şəhidlik zirvəsinə ucalıb və Lənkəran rayonunda dəfn olunub.
Aqşin İbadov bir çox medallarla təltif olunub: III dərəcəli "Hərbi xidmətdə fərqlənməyə görə", "Azərbaycan Silahlı Qüvvələrinin 90 illiyi", "Azərbaycan Silahlı Qüvvələrinin 95 illiyi", III dərəcəli "Qüsursuz xidmətə görə", "Azərbaycan Ordusunun 100 illiyi", II dərəcəli "Qüsursuz xidmətə görə". Ölümündən sonra isə "Vətən uğrunda", "Cəbrayılın azad olunmasına görə", "Kəlbəcərin azad olunmasına görə", "Xocavəndin azad olunmasına görə", "Füzulinin azad olunmasına görə" medalları ilə təltif olunub.
