Qızılağac Milli Parkı 26 sentyabr 1929-cu ildə Xəzər dənizi sahilinin cənub-qərbində, Lənkəran, Masallı və Neftçala rayonları ərazilərində 88.4 min hektar ərazidə köçəri, su, bataqlıq və çöl quşlarının qışlaması, artırılması və qorunması məqsədilə yaradılmışdır.
Sahəsinə görə Azərbaycanda ən böyük qoruq hesab olunan parkda “Qırmızı kitab”a daxil olan heyvan növləri var: qamışlıq pişiyi, flaminqo, ağqaş qaz, adi göydimdik, mərməri ördək, adi bəzgək və s.
Ərazisi və ətrafı su, bataqlıq və yarımsəhra bitkiləri ilə zəngindir. Qızılağac qoruğu 1976-cı ildə YUNESKO-nun siyahısına "Əsasən su quşlarının yaşama yerləri kimi beynəlxalq əhəmiyyəti olan sulu-bataqlıq yerlər haqqında" Konvensiyanın su bataqlıq regionunun biri kimi daxil edilib.
Mənbə: Ekologiya və Təbii Sərvətlər Nazirliyi
