Bu gün, 20 mart tarixində geologiya-mineralogiya elmləri doktoru Əlipənah Bəhmən oğlu Abbasovun anım günüdür.
Əlipənah Abbasov 1954-cü ildə Cəlilabad rayonunun Üçtəpə kəndində anadan olub. 1975-ci ildə Azərbaycan Dövlət Universitetinin (hazırda Bakı Dövlət Universiteti) Geologiya-coğrafiya fakültəsini fərqlənmə diplomu ilə bitirib. Ə.B. Abbasov 1975-1978-ci illərdə Rusiyanın Orenburq vilayətində geoloji ekspedisiyada çalışıb. 1978-1997-ci illərdə Azərbaycan Elmlər Akademiyasının Geologiya İnstitutunda işləyib.
1982-ci ildə Ə.B. Abbasov “Kiçik Qafqazın Sarıbaba sinklinoriumunun gec təbaşir radiolariyaları və onların stratiqrafik əhəmiyyəti” mövzusunda namizədlik, 1993-cü ildə isə “Azərbaycanın təbaşir radiolariyaları (biostratiqrafiya, ekologiya, təkamül)” mövzusunda doktorluq dissertasiyası müdafiə edib.
Ə.B. Abbasov ilk dəfə olaraq radiolariyalara görə Azərbaycanın təbaşir çöküntülərinin ayrı-ayrı rayonlar üzrə bölünmə sxemini hazırlayıb, silisiumlu vulkanogen suxurların yaşını müəyyən edib, həmçinin Kiçik Qafqazda silisium oksidinin toplanma sxemini hazırlayaraq, Azərbaycanın təbaşir radiolariyalarının inkişafında əsas mərhələləri müəyyən edib.
O, 40-dan çox elmi əsərin müəllifi və “Azərbaycanın təbaşir faunası” monoqrafiyasının həmmüəllifidir.
[caption id="attachment_56231" align="alignnone" width="336"]
Facebook[/caption]
