Cənub bölgəsində erkən nikahların sayında azalma müşahidə olunub. Bu haqda məlumatı Cenublu.az bu gün, 1 may tarixində verir.
“2022-ci ildə bizə təxminən yetkinlik yaşına çatmayanlar barədə hüquqların müdafiəsi komissiyasından erkən nikahla bağlı 22 müraciət daxil olunmuşdur. Bu 22 müraciətdən yalnız ikisinin nikahın bağlanmasında zəruri hal müşahidə edildiyinə görə nikahın bağlanması həyata keçirilib. 2023-cü ildə 20 müraciətdən yenə də ikisinə nikahın bağlanmasının zəruri hal müşahidə edildiyinə görə icazə verilmişdir. Digərlərinin isə qarşısı alınmışdır”, - Lənkəran ŞİH başçısının müavini Ülviyyə Əliyeva bildirib.
Günümüzdə sağlam cəmiyyət üçün bu yolda maarifləndirmə işləri də mütəmadi olaraq aparılır. Müxtəlif dövlət qurumları, təhsil idarələri mühafizə orqanları ilə birgə maarifləndirmə tədbirləri aparılır ki, bu da öz müsbət nəticəsini vermiş olur.
Lənkəran Regional Perinatal Mərkəzinin mama ginekoloqu İlhamə Həsənova gənc analarda müşahidə olunan problemlər haqda danışıb: “Hamiləliyə hazır olmayan qız uşaqlarında hamiləliyin baş verməsi ana tərəfindən anemiya, yəni qan azlıqlarına, vaxtından əvvəl doğum təhlükəsinə, döl tərəfindən infeksiyalaşmaya, dölün vaxtından əvvəl doğulmasına, dölün ölümünə gəlib çıxara bilər”.
