Lənkəranda 2002-ci il təvəllüdlü Azər fərdi qaydada valyuta dəyişməklə məşğul olan 1938-ci il təvəllüdlü Xubəliyə qarşı quldurluq edib.
Hadisə 11 fevral 2024-cü ildə baş verib. Azər Lənkərandakı "Mərkəzi bazar"a gedərək Xubəliyə nənəsinin guya 200 min rus rublunu manata dəyişmək istədiyini deyib və onu Cil kəndinə aparmağa razı salıb. Xubəli qohumunun avtomobili ilə axşam saatlarında Azərlə birlikdə kəndə gedib.
Evin həyətinə daxil olduqdan sonra Xubəli evdə heç kəsin olmadığını anlayıb və aldadıldığını deyib. Bu anda Azər cibindən bıçaq çıxararaq ondan pul tələb edib. Cibində 1600 manat olan Xubəli əsa ilə müqavimət göstərib. Azər ona bıçaqla zərbə vurub. Xubəlinin qışqırıq səsinə taksi sürücüsü həyətə daxil olduqdan sonra Azər hadisə yerindən qaçıb.
Azər istintaq zamanı fərqli ifadələr verib. O, ilkin ifadəsində Xubəlini qorxudaraq pul almaq planı qurduğunu etiraf edib. Daha sonra isə məhkəmədə bıçaqla zərbə vurduğunu qəbul etsə də, psixi problemlərinin olduğunu və həmin vaxt anlaqsız vəziyyətdə olduğunu bildirib.
Cinayət işi Lənkəran Ağır Cinayətlər Məhkəməsində araşdırılıb. Məhkəmənin hökmü ilə Azər silah tətbiq etməklə quldurluq törətməkdə təqsirli bilinərək 8 il müddətinə azadlıqdan məhrum edilib.
