Astara rayon Heydər Əliyev Mərkəzində Xocalı faciəsinin 32-ci ildönümünə həsr olunmuş “Xocalı soyqırımı Azərbaycanın tarixində ən dəhşətli və qanlı səhifələrdən biridir” mövzusunda sərgi və tarix dərsi keçirilib. Bu haqda məlumatı Cenublu.az bu gün, 22 fevral tarixində verir.
Astara rayon Heydər Əliyev Mərkəzində A.İbrahimov adına Şüvi kənd tam orta məktəbinin müəllim və şagirdlərinin iştirakı ilə keçirilən tədbirdə “Xocalıya gedən yol” filmi nümayiş olunub.
Çıxış edənlər bildiriblər ki, Xocalının işğalından 32 il keçməsinə baxmayaraq, erməni faşistlərinin və imperiya ordusunun 366-cı motoatıcı alayının əsgərlərinin Xocalının əliyalın sakinlərinə qarşı törətdikləri vəhşiliklər unudulmur. Əksinə, illər keçdikdə qaysaq bağlamayan yaralar göynəyir, xalqımıza qarşı soyqırımı törədənlərə nifrət artır.
Daha sonra tarix dərsi şagirdlərin mövzu ilə bağlı suallarının cavablandırılması ilə davam edib.
Yekunda tədbir iştirakçıları Astara rayon Heydər Əliyev Mərkəzinin Elektron kitabxanasında saxlanılan kitabların və “Rəssamlıq” dərnəyinin üzvlərinin əl işlərindən təşkil olunmuş sərgiyə baxış keçiriblər.
