Astarada sabiq bələdiyyə sədrini balta ilə öldürməkdə təqsirləndirilən şəxsin məhkəməsi başlayır. Bu haqda məlumatı Cenublu.az bu gün, 24 avqust tarixində verir.
Belə ki, 54 yaşlı Eynəli Əzizovun qəsdən öldürülməsi faktı ilə bağlı Astara rayon prokurorluğunda cinayət işi başlanıb və ibtidai istintaq aparılıb.
İstintaqla Astara rayonunun Şümrüd kəndində yerləşən meşəlik ərazidə Aslan Şüvünəliyevin şəxsi münasibətlər zəminində yaranmış mübahisə zamanı tanışı Eynəli Əzizova balta ilə xəsarətlər yetirərək qəsdən öldürməsinə əsaslı şübhələr müəyyən edilib.
Aslan Şüvünəliyevə Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə yekun ittiham elan edilərək cinayət işi baxılması üçün Lənkəran Ağır Cinayətlər Məhkəməsinə göndərilib.
Qeyd edək ki, Dirya kənd sakini, 54 yaşlı Eynəli Əzizov vaxtilə orta məktəbdə müəllim işləyib. O, eyni zamanda bələdiyyə sədri də olub.
