Astara rayonunda Xəzər dənizinin suyunun azalması bütün sahilyanı ərazilərdə müşahidə olunur. Bu haqda məlumatı Cenublu.az bu gün, 27 fevral tarixində verir.
Belə ki, Astarada dəniz təqribən 20-25 metr məsafədə geri çəkilib. Bu səbəbdən rayonun park-bulvar kompleksinin ərazisində bulvarla dəniz arasında böyük quru sahə yaranıb. Belə mənzərə digər sahil ərazilərində də müşahidə edilir.
Sakinlərin sözlərinə görə, Astara Dənizkənarı Bulvarı tikilməmişdən əvvəl burada xüsusi qurğular və daşlar quraşdırılmışdı ki, bulvar hazır olandan sonra su bu hissəyə daxil olmasın. İndi isə Xəzər dənizi geri çəkilib və həmin istehkamlara ehtiyac qalmayıb.
Qeyd edək ki, Xəzər dənizində son yüzillikdə ən aşağı səviyyə 29 metr olmaqla 1977-ci ildə müşahidə edilib. Maksimal səviyyə 26 metr olmaqla, 1995-ci ildə müşahidə edilib. 1995-ci ildən bu günə qədər Xəzər dənizinin səviyyəsinin düşməsi davam edir. Hazırda səviyyə tarixi minimuma, yəni 29 metrə yaxınlaşmaqdadır. Mövcud vəziyyət Xəzərin dib relyefinin seysmikliyi ilə sıx bağlıdır. Müxtəlif illərdə müşahidə olunan kəskin azalmalar sonradan dənizdə suyun səviyyəsinin artması ilə əvəzlənib. Dənizin bu qədər çəkilməsi də müvəqqəti xarakter daşıya bilər.
