Astara rayon Bəxtiyar Rüstəmov adına Asxanakəran kənd tam orta məktəbinin müəllimləri arasında qalmaqal yaşanıb. Bu haqda məlumatı Cenublu.az bu gün, 22 sentyabr tarixində Lent.az-a istinadən verir.
Mübahisə Asxanakəran kənd mədəniyyət klubunun müdiri, eyni zamanda YAP-ın Asxanakəran kənd özəyinin sədri və kənd məktəbində müəllim işləyən İbrahim Həsənzadə ilə məktəbin ibtidai sinif müəllimi, şəhid Sarvan Qurbanovun qardaşı Rizvan Qurbanov arasında baş verib.
İ.Həsənzadə bildirib ki, direktor olan 5 saatdan 2-ni Rizvan Qurbanova verib. “Mən də razılıq verdim. Onun qardaşı şəhid olduğu üçün dedim ki, canımız şəhidlərə qurban. Mən ona müəllim yox, əmi demişəm. Atam da məktəbdə işləyir. Direktorun otağına gedib, məzuniyyət üçün icazə alırdım. Çünki qardaşım əməliyyat olunmalı idi. 44 günlük Vətən müharibəsində ağır zədə alıb. Mənim bu dəqiqə 25 min manat borcum var. Bir az sonra öyrəndim ki, bizi polisə verib”.
Rizvan Qurbanov isə bildirib ki, direktor onun haqqı olan dərs saatlarını İbrahim müəllimə verib. “Mən Lənkəran-Astara Regional Təhsil İdarəsinin müdiri Elxan müəllimdən boş olan 5 saat dərsi mənə verməsini xahiş etdim. Bu barədə direktora da məlumat verdim. O da dedi ki, həmin dərs saatlarını İbrahim müəllimə verəcək. Aradan bir saat keçdi, direktor məni yenidən kabinetə dəvət etdi. Otağa girdim ki, İbrahimin atası, özü və əmisi otaqdadır. İbrahimin atası Ceyhun yaxamdan yapışıb dərsi götürməməyimi tələb etdi. Dedim ki, o saatlar şəhid qardaşı olduğum üçün mənə verilib. Onlar şəhid qardaşıma qarşı təhqiredici sözlər işlətdilər. Mən onların cəza çəkməsini istəyirəm”.
Daxili İşlər Nazirliyinin mətbuat xidmətinin Lənkəran regional qrupunun baş inspektoru, polis baş leytenantı Məhəmməd Rzayev məsələdən xəbərdar olduqlarını və hal-hazırda araşdırma aparıldığını bildirib.
