Kamil Nəcəf oğlu Nəcəfzadə 29 dekabr 1929-cu ildə Lənkəran şəhərində anadan olub [1]. O, kinorejissor Şamil Nəcəfzadənin atası, rejissor Günel Nəcəfzadənin babasıdır [2].
Orta məktəbi bitirdikdən sonra o, 1943-1948-ci illərdə Əzim Əzimzadə adına Rəssamlıq məktəbində oxumuş, 1949-1955-ci illərdə isə Moskvada Ümumittifaq Kinematoqrafiya İnstitutunda ali təhsil almışdır. O, 1955-ci ildə Bakıya qayıdaraq, “Azərbaycanfilm” kinostudiyasında quruluşçu rəssam kimi çalışıb [3].
Rəssamın əsərləri Yaponiya, Türkiyə, Almaniya, Fransa, Kanada və bir çox ölkələrin muzey və şəxsi kolleksiyalarında saxlanılır. O, 1986-cı ildə Vyetnamın Hanoy şəhərində fərdi sərgisinin açılışından sonra 29 əsərini Vyetnam xalqına hədiyyə edib.
Nəcəfzadənin 30 ildir Amerikada yaşayan qızı Aynur Nəcəfzadə demişdir: “Ötən müddət ərzində ABŞ-də atamın 4 sərgisi açılıb və onun daha geniş coğrafiyada tanınmasına nail olub. Kamil Nəcəfzadənin Bakı haqqında rəsm əsəri hazırda Ağ evdə asılıb”.
O, 40-a yaxın bədii və tammetrajlı filmlərin tərtibatçısı olub. Azərbaycan kinosunun qızıl fonduna daxil olan “Sən niyə susursan?”, “Ad günü”, “Mən ki gözəl deyildim”, “Bir cənub şəhərində”, “Bir məhəlləli iki oğlan”, “Uzaq sahillərdə”, “Qara daşlar” və s. filmlərdə quruluşçu rəssam kimi işləyib [2].
Sənətkar müxtəlif illərdə Azərbaycan Mədəniyyət və İncəsənət Universitetinin və Azərbaycan Rəssamlıq Akademiyasının professoru olub, ömrünün sonunadək yaradıcılıq və pedaqoji fəaliyyətlə məşğul olub [3].
Nəcəfzadə, həmçinin bir sıra dram tamaşalarına bədii tərtibat vermişdir. Onların sırasında 1964-cü ildə Azərbaycan Milli Dram Teatrının səhnəsində Hüseyn Cavidin “Knyaz”, 1974-cü ildə S.Vurğun adına Rus Dram Teatrında Səməd Vurğunun “Fərhad və Şirin” tamaşaları var [2].
O, 1976-cı ildə “Azərbaycan SSR Əməkdar incəsənət xadimi” fəxri adını alıb və “Şöhrət” ordeninə layiq görülüb [3].
Kamil Nəcəf oğlu Nəcəfzadə 29 iyun 2011-ci ildə Bakı şəhərində vəfat edib [1].
20-27 dekabr 2019-cu ildə Bakıda Muzey Mərkəzində Kamil Nəcəfzadənin 90 illik yubileyinə həsr edilmiş sərgi təşkil edilmişdir [4].
Ədəbiyyat:
