Yardımlıda kişi sevgilisini qızdırılmış şişlə dağlayıb.
Cenublu.az-ın məlumatına görə, hadisə rayonun Abasabad kəndində baş verib.
Məhkəmədə materiallarına əsasən, 1995-ci il təvəllüdlü Vüqar qeyri-rəsmi nikah münasibətində olduğu qadını müxtəlif bəhanələrlə dəfələrlə döyüb.
İttihama görə, o, bu ilin fevralında qadının gətirdiyi çayın soyuq olmasını bəhanə edərək dəmir şişi odun sobasında qızdırıb və onun bədənini dağlayıb.
Sonuncu hadisə zamanı isə Vüqar çayın gec gətirilməsini bəhanə edərək qadına kəmərlə də zərbələr endirib.
Məhkəmə iclasında zərərçəkmiş qadın bildirib ki, təqsirləndirilən şəxslə qohumdurlar. Onun sözlərinə görə, ötən il onunla könüllü şəkildə qaçıb.
Zərərçəkmiş ifadəsində ilk döyülmə hadisəsi barəsində ailə üzvlərinə məlumat vermədiyini deyib. O, həmçinin bildirib ki, fevral ayında çay məsələsinə görə yaranan mübahisə zamanı təqsirləndirilən şəxs qızdırılmış dəmir şişlə ona xəsarət yetirib. Daha sonra qadın ağlayaraq qayınanasının yanına getsə də, onun dediklərinə məhəl qoyulmadığını qeyd edib.
Sonuncu hadisədən sonra isə qadın evdə heç kimin olmadığı vaxt oradan qaçaraq qohumunun evinə gedib. Vəziyyət barədə atasına məlumat verilib və ata qızını evinə aparıb. Daha sonra polis əməkdaşları hadisə ilə bağlı araşdırmaya başlayıblar.
Zərərçəkmiş məhkəmədən təqsirləndirilən şəxsin azadlıqdan məhrum edilməsini xahiş edib.
Yardımlı Rayon Məhkəməsinin hökmü ilə təqsirləndirilən Vüqar Cinayət Məcəlləsinin müvafiq maddələri ilə təqsirli bilinib və 3 il müddətinə azadlıqdan məhrumetmə cəzasına məhkum edilib.
Əsmər Sənani
