Masallıda 22 yaşlı Tacir sevgili münasibətində olduğu 13 yaşlı Sara ilə cinsi əlaqədə olmaqda ittiham edilib.
İstintaqa görə, Tacir 2024-cü ilin iyul və avqust aylarında Masallı şəhərində meşəlik ərazidə Sara ilə iki dəfə cinsi əlaqədə olub.
Sara məhkəmədə Tacirlə sevgi münasibətlərinin olduğunu deyib. Bundan sonra hamilə qalan Sara 2025-ci il mayın 18-də Sənan adlı oğlan uşağı dünyaya gətirib. Genetik ekspertiza uşağın Tacirə məxsus olduğunu təsdiqləyib.
Sara Tacirdən şikayətçi olmadığını, onu bağışladığını və saxlanılmasını istəmədiyini bildirib. Onun sözlərinə görə, Tacir hər gün uşağa baş çəkir və maddi ehtiyaclarını qarşılayır.
Saranın anası isə qızının hamilə olduğunu yalnız 6 aylıq hamiləlik zamanı öyrəndiyini və bundan sonra polisə müraciət etdiyini deyib.
Lənkəran Ağır Cinayətlər Məhkəməsi Taciri Cinayət Məcəlləsinin 152.4.1-ci maddəsi ilə təqsirli bilərək 6 il azadlıqdan məhrum edib. Lakin cəza şərti hesab olunub və 4 il sınaq müddəti müəyyənləşdirilib.
Tacirə elektron nəzarət vasitəsi tətbiq olunub, gecə saatlarında evdən çıxmaq və Masallı rayonunu tərk etmək qadağan edilib. O, həmçinin uşağının saxlanmasına maddi yardım göstərməlidir. Üzərində nəzarət Masallı Rayon İcra və Probasiya Şöbəsinə həvalə olunub.
Adlar şərtidir.
Mənbə: Demokrat.az
