Lənkəran rayonunda qadına qarşı xuliqanlıq hərəkətləri etmiş şəxs inzibati məsuliyyətə cəlb olunub. Hadisə rayonun böyük kəndlərindən birində qeydə alınıb.
Polisə müraciət edən qadın bildirib ki, avtomobilini tanımadığı şəxs təqib edib, hətta onun evinə qədər gəlib xuliqanlıq edib. Araşdırma zamanı məlum olub ki, 1982-ci il təvəllüdlü Rasim gecə saat 04 radələrində ad günü məclisini tərk edib, tanışına məxsus "Hyundai Grandeur"la Şilavar kəndindən keçərkən qadının avtomobilini görüb və psixotrop maddənin təsiri altında onu təqib etməyə çalışıb.
Qorxu keçirən sürücü maşını evinə qədər sürüb, pəncərələri bağlayaraq düşməyib. Bu zaman onun əri və digər şəxslərlə insident baş verib.
Rasim polis tərəfindən saxlanılıb, barəsində inzibati protokol tərtib edilib. O ifadəsində qadına yaxınlaşmaq məqsədinin sadəcə yol soruşmaq olduğunu deyib. Lənkəran Rayon Məhkəməsi onun 1 aylıq həbsinə qərar verib.
Qeyd edək ki, adlar şərtidir.
