Lənkəranda 38 yaşlı kişi həyat yoldaşını döyməkdə ittiham olunub.
Hadisə Şürük kəndində baş verib. Famil həyat yoldaşı Səmayə ilə alışqan üstündə mübahisə edib. Səmayə ərinə: "Nə bilim alışqan haradadır, sən onsuz siqaret çəkməkdən başqa heç bir işə yaramırsan" deyib. Ardınca isə onun ünvanına nalayiq ifadələr işlədərək "sən kişi deyilsən" söyləyib.
Bundan sonra mübahisə böyüyüb. Famil əvvəlcə yumruqla Səmayənin sifətinə zərbə vurub. Qadın yerə yıxıldıqdan sonra isə onu təpikləyib.
Səmayə polisə və xəstəxanaya müraciət edib. Onun sözlərinə görə, münaqişələrin əsas səbəbi Familin ailəni lazımi şəkildə dolandırmaması, qazandığı pula siqaret və içki alması olub.
Məhkəmə zamanı Səmayə əri ilə barışdığını, zərərin ödənildiyini və ondan şikayətçi olmadığını bildirib.
Lənkəran Rayon Məhkəməsinin qərarı ilə Famil cinayət məsuliyyətindən azad edilib və cinayət işinə xitam verilib.
Adlar şərtidir.
Mənbə: demokrat.az
