Arvadını xüsusi amansızlıqla öldürən Nicat Lələzadə ilə bağlı məhkəmədə yeni detallar açıqlanıb.
İttihama görə, Nicat Lələzadə 2017-ci ildən rəsmi nikahda olduğu, 2023-cü ildən isə ayrı yaşadığı Əfsanə Lələzadənin başqa kişilərlə münasibətindən şübhələnib. 2025-ci ildə keçirilən mediasiya zamanı Əfsanənin boşanmaq istəməsi və barışmaqdan imtina etməsi də onun qəzəbinə səbəb olub.
Hadisə günü Nicat səhər saat 6 radələrində mətbəx bıçağını götürərək Əfsanənin işə getmək üçün evdən çıxmasını gözləyib. Qadını gördükdə ona yaxınlaşıb "Bizim kinomuz bura qədər idi" deyərək saçından tutub çoxsaylı bıçaq zərbələri endirib.
Ekspertizaya əsasən, Əfsanəyə ümumilikdə 17 xəsarət yetirilib və aldığı ağır yaralardan həyatını itirib.
Nicatın müdafiəçisi isə onun əməlini xüsusi amansızlıqla adam öldürmədən qəsdən adam öldürməyə tövsif etməyi və cəzanın yüngülləşdirilməsini istəyib. Nicat isə qadını öldürmək niyyətində olmadığını, cəmi bir-iki zərbə vurduğunu bildirib.
Zərərçəkmiş tərəfin hüquqi varisi isə əksinə, onun ömürlük azadlıqdan məhrum edilməsini istəyib.
Şirvan Apellyasiya Məhkəməsi hər iki tərəfin şikayətini təmin etməyərək 17 il 6 aylıq hökmü qüvvədə saxlayıb.
Mənbə: pravda.az
