Biləsuvarda keçmiş yeznəsini ov tüfəngi ilə öldürməyə cəhd etməkdə təqsirləndirilən Emin Kərimli ilə bağlı yeni qərar verilib.
Şirvan Apellyasiya Məhkəməsində keçirilən prosesdə məhkumun hökmdən verdiyi apellyasiya şikayətinə baxılıb. Hakim Nicat Ağabəyovun sədrliyi ilə keçirilən iclasda şikayət təmin edilməyib və birinci instansiya məhkəməsinin hökmü qüvvədə saxlanılıb.
Hadisə 2024-cü ilin iyununda Biləsuvar şəhərində baş verib. Məlumata görə, Eminin bacısının keçmiş həyat yoldaşı Elçin ondan ayrıldıqdan sonra başqa qadınla ailə qurmağa hazırlaşırmış. Emin isə ondan qisas almaq qərarına gəlib.
Hadisə günü Emin ov tüfəngini götürərək Elçinin olduğu əraziyə gəlib və avtomobilə tərəf iki dəfə atəş açıb. Güllələrdən biri Elçinin sağ əlinə dəyib. Zərərçəkmiş avtomobili sürətlə hərəkət etdirərək ərazidən uzaqlaşdığı üçün Emin cinayət niyyətini başa çatdıra bilməyib.
Elçinə sağ əlin odlu silah yarası və beşinci daraq sümüyünün açıq sınığı diaqnozu qoyulub. Məhkəmə xəsarətləri sağlamlığa az ağır zərər kimi qiymətləndirib.
Lənkəran Ağır Cinayətlər Məhkəməsi Emin Kərimlini qəsdən adam öldürməyə cəhdə görə 11 il 3 ay müddətinə azadlıqdan məhrum edib. O, apellyasiya şikayətində hökmlə razılaşmayıb və özünü təqsirli bilməyib. Lakin Şirvan Apellyasiya Məhkəməsi şikayəti rədd edib.
