Lənkəran Ağır Cinayətlər Məhkəməsində ölümlə nəticələnən yol-nəqliyyat hadisəsində təqsirləndirilən Rövşən Namazəliyev barəsində hökm elan edilib.
Məhkəmənin qərarı ilə o, cəzasını məntəqə tipli cəzaçəkmə müəssisəsində çəkməklə 5 il müddətinə azadlıqdan məhrum edilib.
İstintaqla müəyyən olunub ki, Rövşən Namazəliyev 2025-ci il dekabrın 6-da sürücülük hüququ olmadan və sərxoş vəziyyətdə "Mercedes-Benz E230" markalı avtomobili idarə edərkən Beyləqan rayonunda idarəetməni itirib. Nəticədə avtomobil aşıb, sərnişin Nizami Məmmədov hadisə yerində ölüb.
Məhkəmədə təqsirini etiraf edən Rövşən Namazəliyev hadisə günü dostları ilə balıq ovunda spirtli içki qəbul etdiklərini, qayıdarkən sükan arxasına keçdiyini bildirib. O, törətdiyi əmələ görə peşman olduğunu deyib.
Qeyd edək ki, zərərçəkmiş tərəf təqsirləndirilən şəxslə barışdığını, dəymiş ziyanın ödənildiyini bildirərək məhkəmədən ona yüngül cəza verilməsini xahiş edib.
Mənbə: pravda.аz
