2026-cı ilin diqqətçəkən astronomik hadisələrindən biri olan Orionid meteor yağışı oktyabrın 21-dən 22-nə keçən gecə maksimum aktivlik həddinə çatacaq.
Cenublu.az bu barədə "Hürriyet" qəzetinə istinadən xəbər verir.
Halley kometasından qopan hissəciklərin Yer atmosferinə daxil olması nəticəsində yaranan bu təbiət hadisəsi səma həvəskarlarına maraqlı mənzərə təqdim edəcək.
NASA-nın ilin ən gözəl meteor yağışlarından biri kimi xarakterizə etdiyi Orionidlər atmosferə saniyədə təxminən 66 kilometr sürətlə daxil olur. Əlverişli şəraitdə saat ərzində onlarla meteor müşahidə etmək mümkündür.
Orionid meteor yağışı oktyabrın 2-də başlayıb və noyabrın 12-dək davam edəcək. Hadisə Orion bürcü istiqamətindən müşahidə olunduğu üçün bu adı alıb. Orionidlər Halley kometası ilə əlaqəli iki meteor yağışından biridir.
Mütəxəssislər meteor yağışını gecə yarısından sonra, xüsusilə sübhə yaxın izləməyi tövsiyə edirlər. Əlverişli şəraitdə saatda təxminən 10-20 meteor görmək mümkündür.
Meteor yağışını müşahidə etmək üçün aşağıdakı tövsiyələrə əməl etmək məsləhətdir:
- Ən aktiv dövr: Oktyabrın 21-dən 22-nə keçən gecə.
- Ən yaxşı vaxt: Ay batdıqdan sonra, sübhədək.
- Müşahidə yeri: Şəhər işıqlarından uzaq, qaranlıq ərazi.
Lazım olan avadanlıq: Teleskop tələb olunmur. Gözlərin qaranlığa uyğunlaşması üçün təxminən 30 dəqiqə gözləmək məsləhətdir.
Ay işığı zəif meteorların görünməsini çətinləşdirə bilər. Buna görə də ən əlverişli müşahidə şəraiti Ay batdıqdan sonra yaranacaq. Orionid meteor yağışını həm Şimal, həm də Cənub yarımkürəsindən izləmək mümkündür.
