Sabirabadın Moranlı kəndində həmkəndlisini xüsusi amansızlıqla öldürən Əli Əliyevin məhkəməsində qətlin yeni detalları açıqlanıb.
Hadisə ötən ilin sentyabrında keçirilən toy məclisindən sonra baş verib. Toyda spirtli içki qəbul edən Əli Əliyevlə digər şəxs arasında mübahisə yaranıb. Rüstəm Əliyev mübahisəyə müdaxilə edərək Əliyə irad bildirib. Bundan sonra tərəflər arasında gərginlik yaşanıb. Rüstəmin Əliyə zərbə endirdiyi və onu, eləcə də ailəsini təhqir etdiyi bildirilib.
Əli evə qayıtdıqdan sonra Rüstəmə zəng edərək görüşə çağırıb. Özü ilə mətbəx bıçağı da götürüb. Məhkəmədə deyib ki, Rüstəmin onu yenidən təhqir edəcəyi və ya vuracağı halda onu öldürmək niyyətində olub.
Görüş zamanı mübahisə yenidən qızışıb. Əli bıçaqla Rüstəmin bədəninin müxtəlif nahiyələrinə zərbələr endirib. Daha sonra onun 6-cı və 7-ci boyun fəqərələrini əli ilə sındırıb.
Əli məhkəmədə hadisəni belə ifadə edib: "Bıçaqla bədəninin müxtəlif yerlərinə vurdum, boynunu əlimlə sındırdım." Daha sonra Rüstəmin baş nahiyəsinə təxminən 10 bıçaq zərbəsi endirib və başını bədənindən ayırıb.
Rüstəm Əliyev hadisə yerində ölüb. Əli kənd mərkəzinə gedərək polisə təslim olub. O, məhkəmədə törətdiyi əməldən peşman olmadığını bildirib.
Lənkəran Ağır Cinayətlər Məhkəməsi Əli Əliyevi xüsusi amansızlıqla adam öldürməkdə təqsirli bilərək 19 il müddətinə azadlıqdan məhrum edib.
Mənbə: pravda.аz
