Astara rayonunda qohumunun evindən 9600 manatlıq qızıl oğurlayan şəxsə cəza verilib.
Astaranın Siyaku kənd sakini Şöhrət qohumu Nailin evindən 9600 manat dəyərində qızıl-zinət əşyaları oğurlayıb.
Şöhrət ifadəsində bildirib ki, qızının toyundan sonra 8200 manat mebel borcu və digər borcları yaranıb. Borclarını ödəmək üçün Rusiyaya işləməyə getsə də, deportasiya olunub. 2026-cı ildə həmkəndlisinin toyundan qayıdarkən Nailin evinin işıqlarının sönülü olduğunu görüb və oğurluq etmək qərarına gəlib.
O, həyətə daxil olaraq pəncərələrdən birini açıb evə girib, ikinci mərtəbədəki yataq otağından qızılları götürüb. Daha sonra əşyaları evinin yaxınlığındakı boş sahədə bankaya qoyaraq torpağa basdırıb.
Nail evə qayıtdıqda pəncərənin açıldığını və evdə ayaq izləri olduğunu görüb. Qızılların oğurlandığı müəyyənləşib. Sonradan oğurluğu Şöhrətin etdiyi məlum olub.
Şöhrət qızılların hamısını qaytarıb, zərər ödənilib və Nail ondan şikayətçi olmayıb.
Astara Rayon Məhkəməsi Şöhrəti 2 il 11 ay 26 gün azadlığın məhdudlaşdırılması cəzasına məhkum edib. O, bu müddətdə Astara və Lənkəranı tərk edə bilməz, gecə saatlarında evdən çıxması qadağandır.
Adlar şərtidir.
Mənbə: demokrat
