Şirvan Apellyasiya Məhkəməsi qəsdən sağlamlığa ağır zərər vurmaqda təqsirləndirilən Əkbər Səfərovun cəzasını azaldıb.
İttihama görə, hadisə 2024-cü ilin iyulunda Salyan şəhərində, "Terrasa" çay evinin yaxınlığında baş verib. Əkbər Səfərov həyat yoldaşı ilə həmkəndlisi Namiq Yusifov arasında yaxın münasibət olduğundan şübhələnib və bu səbəbdən zərərçəkmişin işlədiyi avtomobil təmiri sexinə gedərək onunla mübahisə edib.
Mübahisə zamanı Əkbər Səfərov üzərində gəzdirdiyi mətbəx bıçağı ilə Namiq Yusifovun qarın nahiyəsinə bir dəfə zərbə endirib. Nəticədə zərərçəkmişin nazik bağırsağı zədələnib və ona həyat üçün təhlükəli hesab edilən ağır bədən xəsarəti yetirilib.
Birinci instansiya məhkəməsi Əkbər Səfərovu 4 il müddətinə azadlıqdan məhrum etmişdi. Təqsirləndirilən şəxs cəzanın ağır olduğunu bildirərək apellyasiya şikayəti verib və məhkəmə onun cəzasını bir il azaldıb. Ad və soyadlar şərtidir.
Mənbə: Pravda.аz
