Dövlət Ekoloji Ekspertiza Agentliyi tərəfindən Viləşçay su anbarının II növbəsinin tikintisinin ekoloji cəhətdən qiymətləndirilməsi üzrə ictimai dinləmələr keçirilib. Bu haqda məlumatı Cenublu.az bu gün, 17 iyul tarixində verir.
Tədbirdə Vahid İşçi Qrupunun üzvləri, layihə icraçıları, ictimaiyyət və QHT nümayəndələri, aidiyyəti ekspert-mütəxəssislər iştirak ediblər.
İctimai dinləmədə Dövlət Ekoloji Ekspertiza Agentliyinə təqdim olunan layihənin ekoloji cəhətdən qiymətləndirilməsi və kompensasiya mexanizmləri, xüsusilə mövcud yaşıllıqların landşaft elementi kimi qorunması müzakirə olunub, eyni zamanda əhali üçün maraq kəsb edən məsələlərə diqqət yetirilib.
Tədbirdə tikinti və infrastruktur layihələrinin icrası zamanı təbiətdən, yeraltı sulardan, mineral xammal ehtiyatlarından və yerüstü sərvətlərdən səmərəli istifadə edilməsi, onların bərpası və mühafizəsi, bioloji müxtəlifliyin və yaşıllıq balansının qorunub saxlanılmasının xüsusi əhəmiyyəti qeyd olunub.
