Astara Rayon İcra Hakimiyyətinin başçısı Qəzənfər Ağayev “Şibagro” MMC-nin Şahağac kəndi ərazisində yerləşən kivi bağını ziyarət edib. Bu haqda məlumatı Cenublu.az bu gün, 20 iyun tarixində verir.
İcra başçısına məlumat verilib ki, “Şibagro” MMC 2017-ci ildə təsis olunub. 2018-ci ildə ümumi sahəsi 14 hektar olan kivi bağı salınıb. Türkiyə və İtaliya mütəxəssislərinin təlimat və tövsiyələrinə uyğun olaraq, bağda torpaq əkin üçün tam hazır vəziyyətə gətiriləndən sonra yeni üsullarla “Golden Hayvard” növü olan kivi tingləri əkilib, müasir suvarma sistemi çəkilib və digər aqrotexniki işlər görülüb. Kivi ağacı əkildikdən 3 il sonra məhsul verməyə başlayır. 5-ci ildən sonra tam məhsuldar vəziyyətə gəlir. Hazırda hər hektardan 30-35 ton məhsul yığmaq olur. Yığılan məhsullar, əsasən, MDB ölkələrinə satılır. Təsərrüfatda daimi olaraq gündəlik 11 nəfər, məhsul yığımı vaxtı isə əlavə olaraq 60 nəfərdən çox günəmuzd fəhlə çalışır.
İcra başçısı təsərrüfatda görülən işlərlə tanış olub, sahibkarın problemləri ilə maraqlanıb, tövsiyələrini verib. Qeyd edilib ki, Astara aqrar rayon olmaqla torpaqları məhsuldar və bərəkətlidir. Rayonun iqlimi burada tərəvəzçilik, çəltikçiliklə yanaşı, çoxillik əkmələr olan çayçılıq və bağçılığın inkişafı üçün olduqca əlverişlidir.
Azərbaycan Respublikası Prezidentinin 2017-ci ildə imzaladığı “Azərbaycan Respublikasında sitrus meyvələri, çay və çəltik istehsalının inkişafı ilə bağlı əlavə tədbirlər haqqında” Sərəncam və 2018-ci ildə təsdiq etdiyi “Azərbaycan Respublikasında sitrus meyvəçiliyinin inkişafına dair 2018-2025-ci illər üçün Dövlət Proqramı” sahibkar və fermerlərə böyük stimul verib. Yeni salınan intensiv bağların hər hektarına görə nəzərdə tutulan dövlət yardımları və subsidiyalar bu sahələrin gündən-günə genişləndirilməsinə şərait yaradır. Damcı suvarma sistemi ilə təmin olunmuş kivi bağlarının salınması üçün hər hektara görə 9 min manat və ilk 4 il ərzində 640 manat əkin subsidiyasının verilməsinin nəticəsidir ki, rayonda kivi bağlarının ümumi sahəsi artırılaraq 150 hektara çatdırılıb. Baxış keçirilən bu kivi bağının hazırkı vəziyyəti onu göstərir ki, bu sahəni daha da genişləndirmək və inkişaf etdirmək sərfəlidir. Ona görə də əkinə yararlı torpaqları tam əkin dövriyyəsinə qaytarmaq lazımdır. Bu həm ölkədə məhsul bolluğu yaradacaq, həm də xeyli insan işlə təmin olunacaq.
