Masallı rayonunun kəndlərində tütün yığımı davam edir. Bu haqda məlumatı Cenublu.az bu gün, 9 dekabr tarixində ARB Cenub-a istinadən verir.
Fermerlər yığımı vaxtında itkisiz aparmaq niyyətindədirlər. Təsərrüfatçılar tütün əkininin az əziyyət tələb etdiyini və yaxşı gəlir gətirdiyini deyirlər. Aqrotexniki qaydalara düzgün riayət edilməsi və düzgün şitil seçimi nəticəsində bu il Masallıda tütünçülükdə məhsuldarlıq yüksək olub.
Rayonun Banbaşı kəndində yeni tütün sahələri salınıb. Kənddə iki ədəd qurutma aparatı quraşdırılıb. Bu yeniliklər 5 ildir tütün əkini ilə məşğul olan Banbaşı kənd sakini Mais Əhədovun işini daha da asanlaşdırıb:
“Əvvəl çətinliklərimiz var idi. Kustar üsulla qurudurduq. Bir ay ərzində quruyurdu, amma indi qısa bir müddət ərzində quruyur. Cənub bölgəsində bu aparatlar ilk bizdədir, sayı çoxaldıqca tütün əkini də çoxalacaq”.
Bu il tütünçülükdə orta məhsuldarlığın ötən ilin göstəricisindən yüksək olacağı proqnozlaşdırılır. Tütün sahəsində hazırda 25-30 işçi çalışır. Gələcəkdə tütün qurutma məntəqəsinin ikinövbəli sistem əsasında işləməsi planlaşdırılır. Bu isə orta hesabla 60 nəfərin işlə təminatı deməkdir.
“Hektara 30-35 ton yaş, 2,5-3 ton quru tütün götürürük. Qane edir. Təxminən bir həftədir aparatı doldurmuşuq. Bu gündən ikinci aparatı doldurmaq üçün yığıma başlamışıq”, – deyə Mais Əhədov bildirib.
Masallı Dövlət Aqrar İnkişaf Mərkəzinin bitkiçilik sektorunun müdiri Nazim Şahbazov bildirib ki, 2022-ci ildə Masallı rayonunda ümumilikdə 10,7 hektar sahədə tütün əkini həyata keçirilib və 39,6 ton tütün təhvil verilib. Hektara məhsuldarlıq isə 396 sentner olub:
“Masallı ərazisində bu il 15 hektara qədər sahədə tütün əkilib. Əsasən, Xırmandalı, Qızılağac, Banbaşı kəndlərində yaş tütün yığımı davam edir. Fermerlərin yığdığı quru tütünü Şəkiyə aparmaq çətinlik yaradırdı. Bu il Masallı rayonunun özündə məntəqə qurulur. Bu isə fermerləri həvəsləndirəcək”.
Bu il Masallıda fermerlər tərəfindən 15 hektar tütün əkini həyata keçirilib ki, bu da ötən illə müqayisədə 4,3 hektar artıqdır. Bu günə kimi fermerlər tərəfindən 22,76 ton quru tütün təhvil verilib.
