Masallıda 2023-cü ilin yanvar-iyun aylarında hüquqi şəxslər üzrə 93 yeni iş yeri açılıb. Bu haqda məlumatı Cenublu.az bu gün, 21 iyul tarixində verir.
İş yerlərindən 18,3 faizi mövcud, 81,7 faizi isə yeni yaradılmış müəssisə və təşkilatlardadır.
Məşğul əhalinin tərkib hissəsi olan muzdla çalışan işçilərin sayı 2023-cü ilin yanvar-may aylarında 14.793 nəfər, o cümlədən iqtisadiyyatın dövlət sektorunda 7940 nəfər (53,7 faiz), qeyri-dövlət sektorunda isə 6853 nəfər (46,3 faiz) təşkil edib.
Muzdlu işçilərin 19,4 faizini məhsul istehsalı sahələrində, 80,6 faizini isə xidmət sahələrində çalışanlar təşkil ediblər.
2023-cü ilin yanvar-may aylarında muzdla çalışan işçilərin orta aylıq nominal əməkhaqqı 562,1 manat, həmçinin dövlət sektorunda 686,8 manat, qeyri-dövlət sektorunda 421,7 manat təşkil edib, 2022-ci ilin müvafiq dövrünə nisbətən rayon üzrə əməkhaqqı 5,3 faiz, dövlət sektoru üzrə 3,9 faiz, qeyri-dövlət sektoru üzrə isə 8,6 faiz artıb.
Digər fəaliyyət növləri ilə müqayisədə orta aylıq əməkhaqqı elektrik enerjisi, qaz və buxar istehsalı, bölüşdürülməsi və təchizatı bölməsində 710,0 manat, maliyyə və sığorta sahəsində 1504,3 manat, dövlət idarəetməsi və müdafiə və sosial təminat sahəsində 891,0 manat, əhaliyə səhiyyə və sosial xidmətlərin göstərilməsi sahəsində 730,6 manat, təhsil sahəsində 697,5 təşkil edib ki, bu da digər bölmələrdən daha yüksək olub.
