Ötən il Masallı rayonunda 900 hektar sahədən 17 min tona yaxın kartof yığılıb. Bu il isə min hektarda kartof əkilməsi nəzərdə tutulub. Kartof ən çox torpaq, iqlim şəraitinə görə Masallının Cəlilabada yaxın ərazilərində - Təklə, Əhmədli, Ləngan, Sığıncaq kəndlərində yetişdirilir ki, bu da rayon üzrə əkilən ümumi kartof sahəsinin yarısını təşkil edir. Mütəxəssislər deyirlər ki, bəzən fermerlər məhsulu tez əldə etmək niyyəti ilə kartofu erkən, noyabr-dekabr aylarında əkirlər.
Mütəxəssislərin sözlərinə görə, bol və keyfiyyətli məhsulun təməlində duran vacib məsələlərdən biri toxumun düzgün seçilməsidir. Sertifikatı olmayan toxumlardan istifadə satış zamanı problemlər yaradır. “Arizona”, “Arazara”, “Udaçi” - əsasən, fermerlər bölgənin iqliminə uyğun bu sort kartof toxumlarına üstünlük verirlər.
Amma builki xərclər ötən illərə nisbətən 2 dəfə artıb. Təkcə kartof toxumu bir hektar üçün 8 minə başa gəlir.
Bu günədək artıq 700 hektardan çox sahədə aparılan yazlıq kartof əkininin fevralın axırlarınadək yekunlaşması nəzərdə tutulub. Mart-aprel aylarında becərmə işləri aparılacaq. Mayın əvvəllərində isə tezyetişən kartofun yığımına başlanılacaq.
