Üzüm bağlarında quru budama əməliyyatı işləri yekunlaşıb. Bu haqda bu gün, 24 fevral tarixində Cenublu.az ARB Cənub-a istinadən xəbər verir.
Son illər qiymət ucuzluğu üzüm istehsalçılarını ruhdan salsa da, bu il də qədim tarixi olan üzümçülüyün inkişafı üçün Cəlilabadda yeni tinglərlərdən ibarət 10 hektara qədər əlavə üzüm bağları salınıb.
Quru budama üzümçülükdə aparılan ən mühüm tədbirlərdən biridir. Çünki budama vasitəsilə gələcək məhsuldarlığın əsası qoyulur. Qış fəslində quru budamanın aparılmasında məqsəd üzüm kollarını daha tez məhsula salmaq, yüksək və keyfiyyətli məhsul əldə etməkdir. İşlər aparılan zaman hər bir sortun bioloji uyğunluğu, eləcə də torpaq və iqlim şəraiti nəzərə alınır. Cəlilabadda da bu mühüm aqrotexniki tədbirlər ötən ilin dekabr ayından başlanıb.
Builki mövsümün qarlı, şaxtalı hava şəraiti ilə başlanması üzümçülükdə qış budaması əməliyyatını nisbətən gecikdirsə də, istehsalçılar bu işləri artıq yekunlaşdırmaq üzrədirlər. Qeyd edim ki, Cəlilabad rayonunda salınan təxminən 1470 hektarlıq üzüm bağlarının 15 faizini aborigen sortlar, digər hissəsini isə xarici üzüm sortları təşkil edir.
Üzümçülük üzrə mütəxəssis, aqronom İmran Babayevin sözlərinə görə, qida maddəsi ilə zəngin və rütubətlə yaxşı təmin olunan sahələrdə hər hektardan orta hesabla 220-250 min, başqa rayonlarda isə 160-200 min gözcük saxlanılmalıdır. Bu miqdarda saxlanılan gözcüklər çox yüksək və keyfiyyətli məhsulun alınmasını təmin edir.
Rayonun 1500 hektara yaxın üzüm bağlarında təxminən 20 növ üzüm sortu becərilir. Ötən il bağlardan istehsalçılar 15 min tona yaxın məhsul tədarük ediblər. Bunun 7 min tonu texniki sortların, qalan hissəsi isə süfrə üzüm sortlarının payına düşür. Məhsulun 2 min tona yaxını isə Rusiya bazarlarına göndərilib.
