Cəlilabadda yenicə yetişdirilmiş kartof sahələrdə qalıb. Bu haqda məlumatı Cenublu.az bu gün, 8 iyun tarixində Bizim.media-ya istinadən verir.
Belə ki, fermerlər alıcı tapmadıqlarına görə məhsulu yığmağa lüzum görmürlər. Onlar bildirirlər ki, kartofun tarladan toplanmasına çəkilən xərc onun alışına təklif edilən vəsaitdən çoxdur.
Məsələ ilə bağlı Milli Məclisin 68 saylı Cəlilabad kənd seçki dairəsinin deputatı Elman Nəsirov bildirib ki, məsələdən agahdır:
“Cəlilabad fermerləri bu il bol kartof yetişdiriblər. Amma bol məhsulu realizə edə bilmirlər. Ona görə də bəzi fermerlər kartofu, hətta sahələrdən yığmaq belə istəmirlər. Çünki yığım üçün lazım olan vəsait satış pulundan xeyli çoxdur. Ən narahatedici məqam odur ki, onların böyük bazarlara çıxışı yoxdur. Hazırda Bakı və digər şəhərlərdəki ticarət məntəqələrində satılan kartofun qiyməti ilə Cəlilabaddakı kartofun qiyməti arasında ağılagəlməz fərq var. Bu fərq necə yaranır, bilmirəm. Amma bildiyim odur ki, Cəlilabadda külli miqdarda kartof sahələrdə zay olub gedir”.
O əlavə edib ki, Kənd Təsərrüfatı Nazirliyinin bu məsələyə operativ müdaxilə etməsini vacib sayır:
“Hazırda həm dövlətimizin, həm də Kənd Təsərrüfatı Nazirliyinin imkanı var ki, fermerlərdən istehsal etdikləri bütün kartofu alsın və böyük bazarlara çıxarsın, ya da regionlardakı soyuducu anbarlara yığsın. Üzü payıza bazara çıxarıb satsın. Əgər bu addım atılsa, həm fermerlər ziyandan sığortalanmış olarlar, həm də gələcəkdə bazardakı süni qiymət artımının qarşısı alınmış olar. Əgər fermerlərə dəstək olunmasa, çətin ki, gələn il Cəlilabadda bu qədər məhsul yetişdirilsin”.
