Astaranın Şahağac kənd ərazisində yeni intensiv sitrus bağı salınıb. Bu haqda məlumatı Cenublu.az bu gün, 5 iyul tarixində ATV-yə istinadən verir.
Ümumilikdə son illərdə yeni innovativ üsulların tətbiqi ilə salınan intensiv subtropik və sitrus meyvə bağları 200 hektara kimi ərazini əhatə edir.
Uzun illər kol-kosla örtülmüş bu əraziləri indi cərgə ilə əkilmiş sitrus ağacları bəziyir. Ümumi sahəsi 25 hektar olan bağda əkilmiş 16 minə yaxın naringinin tingləri Yaponiyadan gətirilib. Okitsu və Mihovaze adlı sitrus sortlarının bir çox üstünlükləri var.
Aqronom Yasəf Məmmədov söyləyir ki, onlar şaxtaya bir az dözümlü ağaclardır: “7 ildən sonra onlar məhsul veririlər. Məhsuldarlığı da 7 ildən sonra çıxır 200 kiloya”.
Ərazinin torpaq-iqlim şəraiti, qış aylarında şaxtanın nisbətən aşağı olması burada sitrus ağaclarının yetişdirilməsi üçün əlverişli hesab olunur. Bağda ağaclar damcı suvarma sistemi ilə suvarılacaq. Yasəf Məmmədov onu da əlavə etdi ki, gələcəkdə meyvələri daxili və xarici bazarlara çıxarmaq da nəzərdə tutulub. Naringi sortları bir neçə il ərzində cənub bölgəsinin müxtəlif rayonlarında sınaqdan keçirilib və yerli iqlim şəraitinə uyğunluğu yoxlanılıb.
Artıq ikinci ildir ki, sitrusçuluğun inkişaf etməsi üçün yeni subsidiya mexanizmi tətbiq edilir. Qaydalara əsasən, növündən asılı olaraq, salınacaq yeni intensiv sitrus bağlarının hər hektarı üçün 9-11 min manat birdəfəlik subsidiyalar verilir. Yeni salınmış intensiv bağlar da daxil olmaqla hazırda Astarada sitrus bağlarının ümumi sahəsi 4500 hektardır.
