Qızılağac Milli Parkında növbəti "Flaminqo festivalı" təşkil olunub.
Cenublu.az xəbər verir ki, tədbir Ekologiya və Təbii Sərvətlər Nazirliyi və Dövlət Turizm Agentliyinin birgə təşkilatçılığı ilə keçirilib.
Festivalda Ekologiya və Təbii Sərvətlər Nazirliyinin, Dövlət Turizm Agentliyinin rəsmiləri və əməkdaşları, Lənkəran Şəhər İcra Hakimiyyətinin başçısı, hüquq-mühafizə orqanlarının rəhbərləri, qeyri-hökumət təşkilatlarının əməkdaşları, eləcə də milli parkı ziyarət edən turistlər iştirak edib.
Tədbirdə Azərbaycanın qorunan ərazilər şəbəkəsini, iqlim dəyişməsinin biomüxtəlifliyə təsirini və bioloji müxtəlifliyin hazırkı vəziyyətini əks etdirən stendlər, məlumat lövhələri, milli parkların təbiətinə, flora və faunasına dair guşələr, suvenirlər, həmçinin Qızılağac Milli Parkına aid simvollar nümayiş olunub. Eyni zamanda, ziyarətçilər folklor qruplarının çıxışlarını izləyib, ekoviktorinada iştirak edib, qayıq və kvadrasikllarla gəzintiyə çıxıb, körfəz ərazisində quş koloniyalarını müşahidə ediblər.
Həmçinin tədbir çərçivəsində balıqartırma müəssisəsi tərəfindən yetişdirilən çəkikimi balıq körpələri Qızılağac Milli Parkının körfəz ərazisinə buraxılıb.
