Masallıda “Gender üzrə statistik göstəricilər” mövzusunda seminar-müşavirə baş tutub. Bu haqda məlumatı Cenublu.az bu gün, 29 iyun tarixində verir.
Tədbir Statistika İdarəsinin akt zalında keçirilib. Burada rayonda fəaliyyət göstərən idarə, müəssisə və təşkilatların rəhbərləri, əməkdaşları, ərazilər üzrə icra nümayəndələri və tələbələr iştirak ediblər.
Görüşdə Statistika İdarəsinin rəisi Ramin Bəgəlizadə ümumi demoqrafik göstəricilərin müqayisəli təhlili, doğulanların qız və oğlan uşaqları üzrə bölgüsü, nikah və boşanmalar, əmək bazarının, təhsil, səhiyyə və hüquqpozmalar üzrə statistik göstəricilərin yaş və cins bölgüsü haqqında məlumatlar təqdim edib.
Daha sonra Masallı RİH-nin Yetkinlik yaşına çatmayanların işləri və hüquqlarının müdafiəsi üzrə komissiyasının uşaqlarla iş üzrə məsləhətçi-psixoloqu Aybəniz Novruzova, Ombudsmanın Cənub Regional Mərkəzinin rəhbəri Ziya İsmayılov və Masallı 1 saylı Mediasiya Təşkilatının rəhbəri Xanhüseyn Səmədov çıxış ediblər.
Yekunda mövzu üzrə diskussiyalar aparılıb və iştirakçıların sualları cavablandırılıb.
Seminar-müşavirə Masallı Rayon Statistika İdarəsinin təşkilatçılığı, Masallı RİH-nin dəstəyi ilə keçirilib.
