Lənkəran Uşaq-Gənclər İnkişaf Mərkəzinin Yol Hərəkəti qaydaları dərnəyinin rəhbəri Ələskərova Xatirə “Yol hərəkəti qaydaları uşaqların gözü ilə” adlı rəsm müsabiqəsində iştirak edərək təltif olunub. Bu haqda məlumatı Cenublu.az bu gün, 6 mart tarixində verir.
Təltifolunma mərasimində Azərbaycan Respublikasının millət vəkilləri Arzu Nağıyev, Vüqar İsgəndərov, Bəhruz Məhərrəmov, Azərbaycan Respublikasının Xalq artisti Alim Qasımov, Daxili İşlər Nazirliyinin Baş Dövlət Yol Polis İdarəsinin şöbə rəisi, polis mayoru Rövşən Tağıyev, Baş Dövlət Yol Polisi İdarəsinin rəsmisi, polis polkovnik-leytenantı Mübariz Ağayev, avtoekspert, “avtosfera.az” saytının redaktoru Elməddin Muradlı, uşaq-gənclər inkişaf mərkəzlərinin direktorları, müsabiqələrin qalibləri, valideynlər, “1 nömrəli Uşaq-Gənclər İnkişaf Mərkəzi” publik hüquqi şəxsin direktoru Kəmalə Abdullayeva və mərkəz əməkdaşları iştirak ediblər.
Rəsm müsabiqəsi uşaq və yeniyetmələr arasında xeyriyyə məqsədilə keçirilib. Məqsəd uşaqların iştirakı ilə baş verən yol-nəqliyyat hadisələrinin qarşısının alınması üçün onlara küçə və yollarda təhlükəsiz davranış vərdişlərini aşılamaq, təbliğat-təşviqat işlərinin genişləndirilməsində dərnəklərin rolunu bir daha göstərməkdir.
