Cənub bölgəsinin məktəbləri ilin ən yaddaqalan təhsil ocaqları sırasında yer alıb.
Modern.az-ın məlumatına görə, Lənkəran rayon Şürük kənd tam orta məktəbində bu il keçirilən buraxılış imtahanlarında yüksək nəticə göstərən şagirdlərin sayı son 5 ildə rekord səviyyədə olub.
Buraxılış imtahanı nəticəsində məktəbin 12 şagirdi 200-dən çox bal toplayıb. Nəticədə 29 şagirdi 2024-cü ildə universitetə qəbul olunaraq tələbə adını qazanıb. Bu məktəb həm də gözəl mənzərəsi ilə uzun müddət sosial şəbəkələrdə müzakirə olunub.
Həmçinin Masallı rayon Köçəkli kənd məktəbi də fərqlənib.
Belə ki, bu ilin aprel ayında Köçəkli kəndində xeyriyyəçi şəxsin təşəbbüsü və yerli icmanın dəstəyi ilə məktəbə 1 TIR dəftər və qələm hədiyyə verilib. Bu ləvazimatlar ən azı 4 il müddətinə məktəbin ehtiyaclarını təmin edəcək. Əlavə olaraq, məktəbə 800 dəstə yaxın məktəbli forması verilib. Məktəbli formaları tələbatdan çox olduğu üçün onun bir qismi ətraf kəndlərdəki 14 məktəbin 292 nəfər şagirdinə hədiyyə olunub. Bundan başqa, ayrılan pulla Köçəkli məktəbində 23.500 manatlıq təmir işləri aparılıb.
