1990-cı il yanvarın 19-dan 20-nə keçən gecə Bakı şəhərinə və Azərbaycanın bir neçə rayonuna sovet ordusu yeridilərək, dinc əhali kütləvi şəkildə qətlə yetirilib.
Qanlı Yanvar faciəsindən sonra Azərbaycanın müxtəlif yerlərində mitinqlər keçirilirdi. Həmin zaman Cəlilabadda azadlıq hərəkatı fəal olduğundan sovet ordusu bu əraziyə hücum edib. Rus generalı Aleksandr Lebed öz xatirələrində yazıb: “Qala aeroportundan Cəlilabada doğru 5 “Mİ-8” helikopteri uçdu. Hər helikopterin içərisində 15 nəfər adam və müxtəlif silahlar: dəbilqələr, zirehlər, 3 pulemyot, 3 “AGS-17” qumbaraatanları, pulemyotlar və digərləri… 5 dəqiqəlik fasilə ilə daha 16 müxtəlif modifikasiyalı helikopter aerodromdan havaya qalxdı. Tula alayının komandiri polkovnik V.İ.Orlovun rəhbərlik etdiyi gücləndirilmiş hava desant batalyonu Cəlilabada getdi”.
Nəticədə 1990-cı il yanvarın 23-dən 24-nə keçən gecə yerli əhali qanunsuz həbs edilib.
Həmin zaman həbs olunaraq ağır işgəncələrə məruz qalan hadisə şahidlərindən biri Mirşamil Mürsəlovdur: “20 Yanvar faciəsinin davamı olaraq yanvarın 24-də sovet imperiyasının əsgərləri сəlilabadlılara divan tuturdu. Biz Cəlilabaddakı meydanda Bakıda azadlıq uğrunda canlarını fəda etmiş həmvətənlərimizə hüzr mərasimi keçirirdik. Tanklar həmin hüzr mərasimlərini dağıtdı, kütləvi həbslərə başlanıldı. Həmin hadisələrin iştirakçısı olaraq mən də həbs olundum”.
Cəlilabadda o dəhşətli gecənin şahidlərindən biri də Səxavət Məhərrəmov olub. Onun sözlərinə görə, Cəlilabadda baş verən yanvar hadisələrində 100-dən çox sakin yaralanaraq, müxtəlif dərəcəli bədən xəsarətləri alıb. Bundan əlavə, aldığı güllə yaraları ağır olduğundan onlardan 14 nəfər ömrünün sonuna kimi əlil qalıb.
