Azərbaycan şairi, yazıçısı, alimi, mütəfəkkiri və tərçüməçisi Abbasqulu ağa Bakıxanovun anadan olmasının 230 illiyinə həsr olunmuş “Azərbaycanda tarix elminin əsasını qoyan ilk tarixçi” adlı tədbir baş tutub. Bu haqda məlumatı Cenublu.az bu gün, 28 iyun tarixində verir.
Dövlət Himninin səsləndirilməsi ilə başlayan tədbirdə Astara rayon Heydər Əliyev Mərkəzinin direktoru Kübra Səmədova cıxış edərək qeyd edib ki, Azərbaycan elmi tarixində özünəməxsus yer tutan Abbasqulu ağa Bakıxanov "Qanuni-Qüdsi", "Əsrarül-mələküt", "Təhzibül-əxlaq", "Eynül-mizan", "Gülüstani-İrəm" kimi əsərləri ilə böyük şöhrət qazanıb. Dil, coğrafiya, tarix, astronomiya, məntiq, psixologiya və digər elmlərə aid əsərləri onun hərtərəfli bir alim olduğunu göstərir.
Astara rayon Heydər Əliyev Mərkəzinin baş fond mühafizi Elza Kazımova geniş məruzə ilə çıxış edərək bildirib ki, alimin ən dəyərli əsəri heç şübhəsiz uzun illər boyu apardığı ciddi tədqiqatlar nəticəsində ərsəyə gəlmiş "Gülüstani-İrəm" əsəridir. Bu əsərlə o, eyni zamanda Azərbaycan tarixşünaslığının əsasını qoyub. Azərbaycan və Dağıstan xalqlarının tarixindən bəhs edən "Gülüstani-İrəm" faktlarla olduqca zəngindir.
Daha sonra Lənkəran–Astara Regional Gənclər və İdman idarəsinin Astara rayonu üzrə sektorunun baş məsləhətçisi Bəhlul Rufullayev, Astara rayon Tarix-Diyarşünaslıq muzeyinin direktoru vəzifəsini müvəqqəti icra edən Şahin Əliyev, Astara Dövlət Rəsm Qalereyasının direktoru Naibə Mustafayeva çıxış ediblər.
Yekunda tədbir iştirakçıları Astara rayon Heydər Əliyev Mərkəzinin və Astara Dövlət Rəsm Qalereyasının birgə təşkilatçılığı ilə “Rəssamlıq” dərnəyinin şagirdlərinin əl işlərindən və mərkəzin “Elektron kitabxana”sında saxlanılan kitablarından təşkil olunmuş sərgiyə baxış keçiriblər.
