Bu gün 9 May – dünya tarixində dönüş nöqtələrindən biri olan faşizm üzərində Qələbə Günüdür. Alman faşizmi üzərində qazanılan böyük zəfərin bu il 80-ci ildönümünü qeyd edirik.
Azərbaycan xalqı bu müharibədə həm ön cəbhədə, həm də arxa cəbhədə misilsiz qəhrəmanlıq və fədakarlıq nümunələri göstərmişdi.
Cənub bölgəsinin igid övladları
Müharibədə cənub bölgəsinin də fədakarlığı danılmazdır. Lənkəran rayonundan 10 minədək döyüşçü iştirak etmiş, onların 7 mini geri dönməmişdi. Bu igidlər arasında iki dəfə Sovet İttifaqı Qəhrəmanı Həzi Aslanov, Baloğlan Abbasov, Xan Babayev, Şalı Caniyev, Hüseyn Cavadov, Hüseyn Heydərov, Sayad Hüseynov, Mirkərim Kazımov, Manaf Kələntərli və başqaları yer almışdır. Aviasiya döyüşlərində iştirak edən lənkəranlı təyyarəçi Qurban Kərimovun şücaəti də xüsusi qeyd olunmalıdır.
Astara rayonundan isə Böyük Vətən müharibəsində 5612 nəfər iştirak etmişdi. Onlardan 3 nəfəri Sovet İttifaqı Qəhrəmanı, 2 nəfəri isə “Şöhrət” ordeninin hər üç dərəcəsi ilə təltif olunmuşdu. Müharibədən sağ qayıdanların sayı 3721 nəfər idi. Astaradan çıxmış adlı-sanlı döyüşçülər sırasında Sovet İttifaqı Qəhrəmanları Ziya Bünyadov, Mirzə Cəbiyev, İlya Kaverin, üç “Şöhrət” ordenli Rəhmət Hətəmov və Ağahəsən Nəhmətov kimi igidlər yer alır.
Masallı rayonundan isə 10.914 nəfər müharibədə iştirak etmişdi. Onlardan 4248 nəfəri geri dönməmiş, 5093 nəfəri həlak olmuş, 1573 nəfər isə itkin düşmüşdü. Masallılı döyüşçülər Qafqazdan Berlinədək şərəfli döyüş yolu keçmiş, 28 nəfər “Qırmızı Ulduz”, 17 nəfər “Şöhrət”, 10 nəfər “I dərəcəli Vətən müharibəsi”, 1 nəfər isə “Lenin” ordeni ilə təltif olunmuşdur. Bu igidlər arasında Ağamir Fəttayev, Zülfi Xudaverdiyev, Ziyad Həsənov, Adəm Seyfullayev, Fəyyaz Fərəcov və digərləri xüsusi ilə seçilirlər.
Lerik rayonundan 6500 nəfər müharibəyə yola salınmış, 1584 nəfər həlak olmuş, sağ qayıdan 4140 nəfərdən 3314-ü müxtəlif dərəcələrdə yaralanmışdı. 600-dən çox lerikli orden və medallarla təltif olunub.
Biləsuvar rayonundan isə 4 mindən çox insan müharibədə iştirak etmiş, onlardan 700 nəfər müxtəlif orden və medallarla təltif olunmuş, 700 nəfər isə geri dönməmişdi.
Cəlilabad rayonundan isə 6 mindən çox döyüşçü cəbhəyə yollanmış, onların yarıdan çoxu doğma torpaqlarına qayıtmayıb.
İkinci Dünya müharibəsində canlarından keçənlərin xatirəsi xalqımızın yaddaşında əbədi yaşayacaq. Onların göstərdiyi rəşadət və fədakarlıq gələcək nəsillər üçün örnəkdir.
