Masallının Bədəlan kəndi Sovet dövründə öz ziyalıları ilə məşhur idi və bu gün həmin kəndin yetirməsi, respublikamızın tanınmış oftalmoloqu, professor Müşfiq Kərimovun uğurları ilə fəxr edirik.
1985-ci ildə Sovet İttifaqının "ВРЕМЯ" verilişində Müşfiq Kərimovun uğurlarından bəhs edilmişdi.
O, 1990-cı ildə Azərbaycan Dövlət Tibb İnstitutunda təhsil almağa başlayıb. Onu digərlərindən fərqləndirən bu idi ki, onun həmin vaxt 14 yaşı vardı. 1992-ci ildə Kliniki Ordinaturada Azərbaycan Elmi-Tədqiqat Göz Xəstəlikləri İnstitutunda oftalmologiya ixtisası üzrə təhsilini davam etdirib. 1995-1998-ci illərdə Ukraynada V.P.Filatov adına Göz Xəstəlikləri və Toxuma Təbabəti İnstitutunda aspirantura təhsilini alıb. 2007-ci ildə Rusiyanın Yekaterinburq şəhərində "Gözün Mikrocərrahiyyəsi" mərkəzində, 2008-ci ildə isə Almaniyada Bremen şəhərində European Vitreoretinal Training School-da təhsilini dərinləşdirib. Eyni ildə Odessa şəhərində Filatov adına İnstitutda Vitreoretinal cərrahiyyə şöbəsində təlim alıb.
Hazırda Müşfiq Kərimov Akademik Zərifə Əliyeva adına Milli Oftalmologiya Mərkəzində şəkərli diabetin göz fəsadları üzrə bölmənin rəhbəri kimi fəaliyyət göstərir. Onun elmi işləri və mütəxəssis kimi qazandığı nailiyyətlər ölkəmizin tibb sahəsində böyük bir nüfuz qazanmasına səbəb olub.
